蘋果日報:
三成人睇星座擇偶 處女座脫獨高危
聽日又到11.11光棍節，呢個安慰單身狗嘅笑話其實好可悲，做A0真係好sad。有Speed Dating交友配對公司以問卷調查訪問520名、主要係40歲以下嘅單身男女，發現單身原因不外乎擇偶條件苛刻，更有趣發現迷信並非港女專利，男女皆分別約有三成人會以星座及同生肖作為擇偶條件，原來最多人抗拒選擇處女座男女做另一半，因為覺得佢哋完美主義、麻麻煩煩。
Speed Dating交友配對公司HK Romance Dating Limited兩位創辦人就係前新聞主播張惠萍同黃嘉如，佢哋話曾經接過一個有趣個案，一名36歲任職測量師嘅男士，擇偶條件竟然係唔可以屬虎，原因係媽媽話阿仔同屬虎嘅女仔命格相沖，而佢喺過去拍拖經驗又咁啱發現屬虎嘅女仔唔適合自己，所以認同媽媽嘅說法，定下擇偶條件為女士不能屬虎。媽媽嘅說話原來會製造不少單身狗。又有一名29歲任職核數師嘅女士因媽媽叫佢要門當戶對，要選擇醫生或律師做伴侶，結果佢單身近7年。
空姐成日飛 男士卻步
兩位創辦人話畀八方聽，工作情況會影響「脫獨」，不少男女皆不期望另一半需通宵工作，即使空姐樣靚身材正，但因為空姐成日飛，令人冇安全感而導致男士卻步；亦有女士忙到不分晝夜地工作，甚至3日未曾見過同住父母，即使有男士不停傳訊息追佢，佢因忙碌而已讀不回，結果長期單身。
#hk romance dating #HKRD #香港婚活 #單身 #約會 #Speed Dating
上一篇: am730: 處女座勁挑剔？虎女有相沖？ 脫獨會很難