星級分享
銘德中醫診所 分享

星級分享 - 蘋果日報: 唔唱歌轉行睇症 星光幫蔡梓銘:使命係推廣中醫 - HK Romance Dating | Speed Dating Hong Kong - matching 、配對 、約會 、 交友、結識異性專家

蘋果日報: 唔唱歌轉行睇症 星光幫蔡梓銘:使命係推廣中醫

打支針未必快啲好,所以好多人都鍾意睇中醫,認為比較皇道正氣,但中醫予人感覺康復得好慢,仲有百子櫃、同坐陣一缸缸藥材前睇住報紙嘅郎中。

 

等等先,呢啲刻板印象已經成為過去喇!今時今日嘅中醫已經好專業,甚至可以係後生兼靚仔,而且仲曉唱歌,講緊嘅,係19歲參加過《亞洲星光大道》、贏過季軍現年26歲嘅蔡梓銘,之後仲成為咗亞視藝員。

 

同一時間蔡梓銘考到中文大學中醫系,一邊讀書一邊做嘢,到舊年卒之執業掛牌行醫。初期喺佐敦開館行醫,佢話:「收銀、聯絡、客戶經理同reception都係一腳踢,因為得一個人。做咗一年覺得都時機成熟,所以轉咗嚟油麻地大啲嘅地方,請多咗人。」蔡梓銘話o依家嘅中醫,已經唔同藥材舖打躉年代,而自己亦有一個使命感,佢話:「讀中醫、唱歌同以前喺亞視做主持好似冇關係,其實係有嘅。我有個使命係推廣中醫學畀年輕人,出到去學校講學,同佢哋唱返隻歌,中醫識唱番隻歌喎,成件事又唔同。」蔡梓銘仲話參賽就會唱《菊花台》,見到年輕人就會唱Beyond嘅《海闊天空》,即場仲示清唱咗《光輝歲月》。

蔡梓銘話未讀醫之前,因為鍾意寫嘢,所以諗過去中大讀新聞系或者商科,佢話:「當年第一志願係新聞系,中醫第二,後嚟入咗中醫科都諗住讀一年啦,出年就轉。」不過期間發生咗一件事,令到佢下定決心學醫:「讀咗一年之後遇到件事,有位朋友隻腳痛咗好耐都醫唔好,行唔到坐又好辛苦,最後幫佢針咗一針,佢起身行舒服咗好多,係咁多謝我,嗰一刻心有種好微妙變化,見佢咁開心同多謝我,令我好感動,叫自己『唔好喊唔好喊』。」

 

學咗醫之後,蔡梓銘對中醫嘅睇法同一般市民好唔同,佢以剛剛幫蘋果同睇病舉例,話胃痛可能係心情影響,同佢傾咗幾句之後,見佢嗰人明顯輕鬆咗,帶出一個道理:「胃唔好可能係心情影響,睇病之外仲會同病人傾下偈,用藥、針灸、推拿可以醫病,但能夠講嘢醫到人,先喺中醫學。」

喺蔡梓銘做亞視主持時,佢話爸爸講過「發夢都冇估到嗰仔做主持」,當做中醫時爸爸又話「發夢都冇估到嗰仔做中醫」,自言出身小康家庭,老竇做紡織廠生意,媽咪係家庭主婦,父母只係想嗰仔做到喜歡嘅工作,o依家媽咪都喺診所幫手執藥:「冇壓力,不過讀咗醫有一種使命感,希望透過媒體同講座,喺青少年教育上做一啲嘢,推動中醫,將一啲好同正面嘅價值觀、思想同佢哋分享。」

蔡梓銘話香港人通病係認為錢可以買健康同所有嘢:「今日醫好你胃痛,但你唔去解決情緒工作壓力、唔解決同老婆阿爸阿媽嘅拗撬,你個病可能唔駛好耐就會返嚟,到時可能仲嚴重。」 

資料圖片:

~~~~~~~~~~~~~~~~~~~~~~~~~~~~~~~~~~~~~~~~~~~~~

一篇:Beauty Exchange: 女中醫教你用最便宜的方法美白祛斑 (下)